موسم المتعة.. الامتحانات

احم احم

موسم الامتحانات.. الوقت الي بنزل علينا فيه الوحي وبنصير كلنا شعراء ورسامين ومبدعين..

أنا نفسي أعرف ليش بصير معنا هيك؟

يعني فوق ما بكون الواحد وضعه زبالة وبالأرض وبشحد النجاح شحدة.. بصير كل اشي بفترة الامتحان ممتع وبتكثر الهوايات.. مثلا:

- بصير في عندك دايما اشي تحكيه مع أهلك مع إنه بدون امتحانات يا دوب تشوفهم.

- بصيروا اخوانك من أقرب أصدقاءك وبتضل قاعد معهم ع حكي ولعب وضحك

- بتتذكر كل اشي صار معك من لما انخلقت وبتصير تفكر فيه

- فاجأة بتكتشف إنك بتحب أو بتصير تحب وكل ما تقرأ كلمة بكون فيها حرف من اسم اللي بتحبها/بتحبيه وخذلك ساعة سرحان

- بتكثر مشاوير عيلتك وصحابك الحلوة وبالعطلة بضلوا مربوطين بالدار

- كل ما بدك تدرس بتتذكر إنك بدك تنزل إشي من الإنترنت وبس تروح تنزل لازم تتطمن عل الفيس بوك وبقص إيدي إذا ما سحبت معك أقل إشي ساعة وبتروح رغبتك بالدراسة

- كل الناس بتكون أون لاين لأنه امتحانات

- إذا كنت من الي ما بحبوا يطلعوا بتصير بدك تطلع وإذا ما بتحب التلفزيون بتصير تعشقه وبصير أتفه مسلسل أو برنامج من الأشياء المفضلة

- بتصير محترف تضييع وقت

- آه، أهم إشي النوم.. بصير هواية..

- بتصير مادة المتحان تتكاثر فجأة بالانشطار الثنائي.. وكل صفحة بتخلص دراستها بتولد 10 صفحات بدهم دراسة.. ياخي متى كاينين ماخذين كل هالحكي.. أو بالأحرى متى لحقنا

- بصير الجو حلو ومغري لطلعة أو رحلة وبس تعطل يا بتكبس ع شتا إذا كان الموسم يا بقلب الجو صحراوي وعواصف رملية وحرارة بالأربعين

- بتحس كل الأمراض معك وبصير كل اشي يوجعك

- بتكثر الأحداث والحفلات والمهرجانات والأشياء الي نفسك تروح عليها

- بيجوا المغتربين من السفر وبسافروا بدون ما تلحق تشوفهم

- بكون إلك ألف سنة بتستنى يجيبوا فيلم وإلا إشي بدك تحضره أو في مباراة بتطلع ليلة الامتحان

- كل ما بدك تتنفس أهلك بحكولك ملحق ع شو مستعجل بعد الامتحان اعمل الي بدكياه.. ما بعرفوا إنه في أشياء إذا راحت عليك خلص بتروح للأبد.. وبعد الامتحانات إذا بتركوك بحالك تعمل الي بدكياه "ابقى قابلني"

- ليلة الامتحان بتكبر 20 سنة

والقائمة ما بتخلص.. وبتضحي بحياتك الاجتماعية وبتحاول تنسى إنه كل إشي بده يروح عليك وبتحاول تقنع حالك إنه دراستك أهم.. لا والأنكى من هيك إنك ما بتزبط بالامتحان وبتروح تحكي لو ما درست أشرفلي كان رسبت بجدارة ولما تتبهدل عل العلامة بتقول لو عملت الي كان بدي أعمله كان استفدت اشي على الأقل وانبسطت شوي..

أخ بس!

المهم، أنا ما بحكي ما تدرسوا! لا ادرسوا أحسن إلكوا لأنه بلاش نكون بنزرع لو وتطلعلنا يا ريت.. وربنا ما بنسى حدا

R.M.Z

READ MORE - موسم المتعة.. الامتحانات

اللي استحوا ماتوا

مبارك!! الله لا يبارك فيك يا رب!! أنا متأكدة إنه يوم ولادتك ما كان مبارك أبدا!!

أنا ما بدي أدخل بسياسة أو ما يحزنون.. بس بدي أحكي من وجهة نظر إنسانية.. خلينا على بر الأمان..

يعني هسا حسني مبارك ، إنه بالله عليه!! إذا مش مشان ال 8 ملايين بني آدم اللي بدهمش خلقتك.. خليها مشان حالك.. 83 سنة عمرك و 30 سنة عمر حكمك وما زهقت السلطة؟ ما زهقت الكرسي؟ ارحم حالك يا زلمة.. ارحم شيبتك (اللي مخبيها).. ارحم صحتك!!

أي قانون دولة بيحكمها رئيس بالانتخاب بقول إنه واحد بيترشح 1000 دورة طول ال 30 سنة.. ويا ريت إنه رئيس محبوب أو جايب فايدة للبلد.. بالعكس..

بدك تعمل فرعون جديد بمصر.. أهلا وسهلا.. بس آخرة فرعون جهنم بعد الموت!!

بدك مصاري.. أي علي ما علي إنك بعد 30 سنة من نهب هالبلد صار معك اللي يعيشك ملك كمان 83 سنة غير اللي عشتهم.. ليش البطر؟ ليش الظلم؟ ليش اللزقة بالكرسي؟

صح ما بطلعلنا نحكي لأنا مش بمصر ولا مصريين.. بس لازم نوصل صوتنا لأنهم إخواننا إذا مش بالعروبة ولا الدين فبكون بالإنسانية.. الإنسانية اللي حسني مبارك ما عنده منها ذرة!! وكلنا مصر يا مبارك!!

قتلوه حلال هالزلمة.. بس عاد الشاطر اللي يوصله..

لا وبعملك خطابات.. وبخلينا نتحمس إنه وأخيرا بجوز بده يستحي ع دمه ويترك هالكرسي.. بصير يحكيلك مصر بلدي وأنا بدي أخلي خاتمة مدة رئاستي "مسك" بالأشهر الجاية.. لا ومشان يعطي أمل قال ما بده يترشح للدورة الجاي.. هههه.. ليش هو ع كيفك يابا؟! كأنه الشعب رح يخليك تتترشح!!

بعدين لو سكتولك هالكم شهر اللي ضايلينلاك بالرئاسة، أنا متأكدة بس يهدوا من هون غير تحكمهم إعدام واحد واحد من هون.. وتطلع عيونهم إذا ضل عندهم عيون من ظلمك! بس الشعب المصري مش غبي.. الشعب المصري شعب حر.. شعب بدور على حقه بإنه يعيش كريم وبأمان..

وبكفي خطابات كل يوم والثاني.. الشعب ما بياخذ بخطابات الرؤساء اللي بيعيدوا وبزيدوا فيها بكل مناسبة.. ويا ريت تكون على الأقل إنت اللي كاتبه..

يعني شعبك ما بدوياك.. مش خجلان ع حالك.. لا وبتروح تصبغلي شعراتك.. إنه مثلا بده يبطل عمرك 83 سنة وإلا بده يبطل إلك 30 سنة ظالم هالشعب وبتبطش فيهم!!

أي عن جد اللي استحوا ماتوا..

روح يا مبارك روح.. الله يوخذ منك هالروح!!

R.M.Z

READ MORE - اللي استحوا ماتوا

مصر.. البيت بيتك

مصر...البيت بيتك

شاهدنا خطاب الرئيس حسني مبارك بعد ساعة من الانتظار، ساعة من التكهنات، من الاستماع للمحللين، و أخيرا جاء الخطاب ليؤكد لنا أن الرجل حقا عسكري في النهاية! خطابه كان جافا برغم أن كلمات الخطاب المتقنة كانت مليئة بالمشاعر، خطابه بأفضل الأحوال كان "خيبة" فرغم أنه حاول مخاطبة الشعب المصري كإخوانه إلا أن صوته وبوضوح كان يعاملهم بدونية، المصريون؛ يحتجون يعتصمون ويصرخون "لا!! كفاية ظلم و استعباد" لقد شبعوا وطنية زائفة، كما شبع أهل تونس من قبلهم، هم لا يريدون منك سوى العدل، أنا لا ألومك فلقد شاهدت القناة الوطنية المصرية التي بثت أصوات ووجوه "محبيك" الذين لا يتجاوز عددهم الألف و تناست بث أصوات الملايين! أترى وطنية زائفة مجددا!! أشاهد الأخبار و أحيانا أتعاطف معك، من ظن أنه بعد ثلاثة عقود من "الحب" سينقلب كرها؟ من ظن أن الشعب سيعثر على صوته؟ من ظن أن أحدا سيثور يوما على ابتسامتك الشهيرة الخالية من البهجة أو على شموخك الملوكي؟ عذرا.. لقد نسيت فأنت لم تكن يوما تطلب الجاه أو السلطه!!

كفاية هجوم، سأدافع عنك ربما في وقفتك تلك شيئ من الحكمة، إذا خلعت أنت ستدرك كل الشعوب العربية أنها تملك التغيير، وسنغرق في فوضى الديمقراطية والحرية والتغيير! حقا يا لتلك الغوغائية...

سيدي الرئيس -رغما عن أنوف شعبك- أنا أحييك...فأنا لم أشاهد أحدا أشد حرصا على "مصالحنا" منك و لم أشاهد أحدا أشد "رفضا" للسلطه منك ، رعاك الله و أدامك ذخرا لهذه الأمة! و أقول في الختام أنني معجبة بتمسكك الشديد بشعار الحملة الإعلانية "مصر...البيت بيتك" كما أتمنى وبكل صدق أن تخرج مصر أقوى من هذه الأزمة لأنها فعلا أم الدنيا!

S.S.R

READ MORE - مصر.. البيت بيتك

Because I am a real woman...

I might have wrinkles in my face, I might laugh loud ... and make nonsense sometimes ... but darling, that's because am a real woman! Those wrinkles show you that I’ve been through pain, time, and joy... i.e i have a real life! .... Some say that am emotional, aggressive or even irrational; well, emotions are just like "wild horses" they seem difficult to deal with but they are the most beautiful! aggression accrues not when I think that you are not fighting for me , but when I know that am far away from the stars !... irrational ???!! ... well , let me tell you something about logic and reason ; so many things may not be proved but still can be true , just like miracles ;and that's enough reason for so many of my actions ! That’s how a real woman paves her path through history!

YES , am a real woman ... when I love I give it all and have stars in my eyes ... and when I revenge , I do so with a smile !... it might sound hard to live with , but this is how I discover the world ; through pleasure , through solitude and through scarifies ! My world might look pink to you, but pink is what sky looks before sunrise and before sunset! ... So you might never know what's on the road! ... I believe in giving many chances but I also consider many others alternatives ... you may not be the center of my world, still, once I am by your side you feel like you have it all! YES because am a real woman ... I have the power of ancient tombs, the wisdom of old trees, the purity of wide oceans and the beauty of the sky! ...

Raneem Faisal

READ MORE - Because I am a real woman...

المسلسل التركي

المسلسلات التركية فيها عدة عوامل مشتركة حتى يكون المسلسل ناجح، و أنا حبيت أعددهم في حال إذا حدا حابب يعمل مسلسل تركي!

أول إشي اختيار الاسم: عشان يكون مسلسل تركي ناجح لازم يكون اسم مثير و غريب و بدل على قصة رومانسية أو يكون على اسم وحدة من الشخصيات على أن تكون "شقفة"

ثاني إشي لازم يكون في اتنين بحبو بعض "البطل و البطلة" طبعا بكونو أحلى اتنين و أطيب اتنين و ما في حدا كرموش زيهم،بس بصير سوء تفاهم و بنضلنا ندعيلهم إنو الله يوفقهم و يلمهم عبعض!

ثالثا: بكون في وحده بتكون بتلف على "سبع البرومبه" البطل طبعا هي مش حلوه و لئيمه و أبصر شو مالها و كلنا بنكرهها، المهم إنو البطل ما بكون بحبها فبتعمل خطه خمسية و بتفشل بالنهاية!

رابعا زي ما بكون في واحد بلف على البطل،بكون في واحد بلف عالمزّة "البطلة يعني" –ما في حدا أحسن من حدا حبيبي- و برضو هادا بكون مريض نفسي و بشع و البطلة بتكون مش معبريتو بشلن عأساس إنها بتحب سبع البرومبة!

خامسا بكون في اتنين ختايرة بحبو بعض،واحد بتكون ماتت مرتو من ٢٠ سنه،و واحدة تطلقت من ١5 سنة، بلاقو بعض و بحبو بعض!

سادسا بكون في "سر خطير" مخفي عن البطل أو عن البطلة،و بس يكتشفوا هادا السر بتنقلب حياتهم (زي اللي عنجد!)
طيب في سؤال بطرح نفسه، إذا كل المسلسلات التركية نفس السولافة،ليش ناجحة؟
ببساطة لأننا شعب مش رومانسي، أصلا لو بتحكي هاي الكلمة في الشارع يمكن ١ من كل ٣ يفكرها طبخة، و هادا إذا متجوز بحكيلك "زيح غاد مش ناقصني قرف"

يعني عنا نقص حاد بالرومانسية، و لازم نعالجو، و بما إنو "رجالنا" (خزاة العين و صلاة النبي عليهم بلاش نطرقهم عين) ما إلهم دخل بالرومانسية فشو المانع نستوردها من تركيا؟ هي وقفت على هاي ما إحنا كل إشي بنستوردو

إحنا كلنا بنعرف إنو الحب عنا مسخرة و حكي فاضي و تضييع وقت، الحب عنا شو؟ يا هي بتضحك عليه، يا هو بضحك عليها، إحنا الحب عنا إجمع و إطرح، نظرية هون و قانون هناك و بنطلع بالأخير مش فاهمين إشي ...إحنا بنحضر تركي لأنا بدنا نحب و تزبط معنا،مشان الله خليها تزبط معنا بدون وجع قلب و بدون ما نضحك على بعض

و لّا أحكيلكوا هاي مستحيلة، خليني أروح أحضر تركي أريحلي

READ MORE - المسلسل التركي