JN VIDEO

Popular Posts

قافلة الحرية.. أو اللي كانت قافلة حرية .. وا قافلتاه.. وا ويلاتاه.. وا معتصماه

Tuesday 1 June 2010


بما إنه الموضوع سياسي شوي بتمنى اللي بده يقرأ يكون شايف الأخبار قبل ما يتفلسف علي، وأنا بس بعبر عن غضب وثورة في داخلي.. ما عم أعبر عن حزب أو كتلة أو منظمة.. أنا بعبر عن رأي بنت عربية مسلمة بتتمنى عهد صلاح الدين يرجع.. بالأحرى بتمنى كرامتنا وعقلنا يرجعولنا قبل ما نموت وإحنا بنتفرج وبنضحك...

الموضوع مش إنه اسرائيل اعتدت على السفينة وما سمحتلها تمر، يعني ما هي مبينة ما أحلاهم يخلّوها تفوت غزة وهم بيتفرجوا، صح حكوا إنه بدهم يفتشوها ويسمحوا بدخول مواد معينة بس، بس الغدارين معروفين، سيطروا على الست سفن وأجرموا بحقهم، لو بدهم يسمحوا لقافلة تفوت على غزة كان من أول ما حاصروا غزة هيك لو بدهم يرجعوا يسمحوا بدخول المساعدات، المهم، النقطة المهمة بالموضوع، إنه اسرائيل تمادت وتمادت وياما عملت "فجائع" وجرائم حرب وإلهم سنين وسنين بقتلوا بإخوانا بفلسطين، يعني ليش مستغربين منهم إنه يدمروا سفينة مساعدات؟ لأنهم عارفين إنه العالم رح ينهز شوي وبعدين بينسوا؛ لأنهم متعودين إنهم بيعملوا عملتهم، الصحافة والإعلام بيحكوا فيها شوي، الشعوب بتعمل مظاهرات واحتجاجات، وبعد كم أسبوع كل واحد بيرجع يلتهي بحاله.. مش لازم نعتب بس على اسرائيل.. لازم نعتب على حالنا.. إحنا بنعمل زي الأهل اللي بدلعوا ابنهم وبيسكتولوا، أو بيبهدلوه شوي لما يغلط وما بيعاقبه زي العالم.. وبس يرجع يغلط بيعيدوا نفس القصة ونفس البهدلة، طبعا على الفاضي.. يعني الولد رح يضل يغلط ورح يبطل يفرق معه إشي، ما هي بهدلة والسلام.. اسرائيل هيك بالزبط، بتغلط وبترتكب جرائم، وبتحكي "يللا، بيحتجوا وبيتظاهروا وخلصت راحت.. اتعودنا"، لأنه لو في عندهم ذرة شك واحدة إنه العالم أو العرب لحالهم رح يوقفوا ضدهم كان ما عملوا اللي عملوه...

هلأ العالم بيعدوا الضحايا والجرحى.. بالله عليكم؟.. ما خلص اللي مات مات واللي انصاب انصاب وبالله وإنتو تعدوا ما تنسوا تحسبوا المليارات اللي ماتوا قبلهم.. بس فكروا باللي بعدهم عايشين ورح يموتوا نفس الموتة على إيدين الاسرائيلية إذا ضليتوا ساكتينلهم.. وإلا إحنا ما بنتحرك إلا لحتى يوصلوا باب بيتنا.. يعني التركي والفلسطيني والاسباني واللي ما بعرف من وين هدول مش بشر؟ مش بني آدمين؟ يا حيف بس يا حيف.. لا شايفين شهامة العرب.. ولا رحمة المسلمين.. ولا سماحة المسيحيين .. ولا صداقة الشعوب.. كل اللي شايفينه.. اسرائيل بكفة والعالم بكفة.. وكفة اسرائيل راجحة.. إحنا شايفين غدر اسرائيل.. اصحوا يا ناس يا عالم.. قبل ما يوصل الدور عنّا!!

وهينا بنستنى بمجلس الأمن الدولي يطلع معه إشي، اللي على الساعة 9 المسا عقدوا جلستهم ورئيس المجلس اللبناني اللي اليوم بيخلص دوره بالرئاسة الله يساعده ...

هلأ نيجي للمنطق – اللي هو لعبتي –

المنطق بيحكي إنه الدولة اللي كلنا خايفين منها بتقصف سفينة لأنه ما بعرف 2 أو 3 فيها معهم سلاح؟ يا سلااام.. الدولة اللي مخوفة العالم بتخاف من مسدسين..

المنطق بيحكي إنه اسرائيل بتقدر تستعمل السلاح بحجة الدفاع عن النفس – وهي السفينة من أصله رايحة لغزة العربية يعني ما حد جاي باسرائيل– وهي من أصله ما وصلت حدود "دولة" اسرائيل البحرية وكانت بالمياه الدولية

المنطق بيحكي الواحد بدافع عن حاله بالسلاح ضد ناس لا جاية فيهم ولا معهم سلاح من أصله

المنطق بيحكي إنه الاسرائيليين وهم مش على أرضهم ومش ببلدهم يشبعوا ويعيشوا ويناموا وأهل غزة اللي ببيوتهم اللي ورثوها من أجدادهم وتعبوا بأراضيها لا ياكلوا ولا يشربوا ولا يناموا..

المنطق بيحكي إنه إحنا العرب اللي بينا وبين غزة شبرين نستنى تركيا تبعث مساعدات لأهلنا وإخوانا اللي إحنا بنتفرج عليهم وهم بيموتوا

المنطق بيحكي إنه العالم كله ما يقدر على اسرائيل

المنطق بيحكي إنه اسرائيل اللي ما إلها دولة تتحكم بكل دول العالم

احكولي بالله.. ليش إحنا البشر ما بنقتنع بالمنطق؟!

المنطق بيحكي إنه هاي المقالة المفروض تحكي عن قافلة الحرية.. بس ما حكت عنها

والمنطق بيحكي إنه أنا لازم هلأ اكون عم أدرس بس من الغضب اللي جواتي على العالم عم أكتب هاي المقالة

دمتم بخير أعزائي..

تحية لأبناء غزة الصامدة.. تحية لتركيا.. تحية لاسرائيل – بس لأنها عرفت ترقص العالم على أصابعها العشرة - .. تحية للأنظمة السياسية العظيمة صاحبة الحنكة .. وأهم شي تحية لقافلة الحرية اللي ماتت ضحيتنا كلنا .. وتحية إلكم لأنه تحملتوا المقالة ووصلتوا لهاي الجملة J

R.M.Z

5 comments:

Anonymous said...

awwlan ana b7ayeekee
tane she fe3lan zay ma 7akete : " الشعوب بتعمل مظاهرات واحتجاجات، وبعد كم أسبوع كل واحد بيرجع يلتهي بحاله.. مش لازم نعتب بس على اسرائيل.. لازم نعتب على حالنا.."
wadlel ma 8alaho t3ala fe soret alra3d " إن الله لا يغير ما بقوم حتى يغيروا ما بأنفسهم"
w fe3lan kal3adeh mhma 9ar w mhma 6el3at 8rarat dawleyyeh w 8rarat mn majles elamen w mn ab9ar sho had kollo ma 7ay3'ayyer she belwa8e3 bdon ma eno e7na n3'ayer mn anfosna!
w ma 8oltee "المنطق بيحكي إنه الاسرائيليين وهم مش على أرضهم ومش ببلدهم يشبعوا ويعيشوا ويناموا وأهل غزة اللي ببيوتهم اللي ورثوها من أجدادهم وتعبوا بأراضيها لا ياكلوا ولا يشربوا ولا يناموا.."
howa bezzab6 ma 8a9adoh amer elsho3ra2 fe :"أحرام علي بلابله الدوح .... حلال للطير من كل جنس"

w hon ".. اسرائيل هيك بالزبط، بتغلط وبترتكب جرائم، وبتحكي "يللا، بيحتجوا وبيتظاهروا وخلصت راحت.. اتعودنا"، لأنه لو في عندهم ذرة شك واحدة إنه العالم أو العرب لحالهم رح يوقفوا ضدهم كان ما عملوا اللي عملوه..."
thakkarteene belle sme3to marra 3an ra2eeset elwwozra2 el9ohyoneyyeh fe elsetenat eno lama 9ar 7ar8 elmasjed ela89a 5afat katheeran w 8alat eno entaht dawlet israel bhad el fe3el ,,, laken lamma shafat raddet fe3l el3rab w shafat eltwa6o2 el3rabee , 7akat la2 5alaa9 e7na hek 9'mena eno israel 5ala9 7akmat w sadat eldowal el3rabeyyeh w sadat el3alam ajma3!!

fe ennhayeh ana kman lazm akon badros , bs hsadne elm8al , w b7ayeke kman marra 3msha3rek el9ad8ah .
w yaret kollna nebda2 etta3'yeer 7atta nerja3 mn jdeed elomeh eleslameyyeh 3zaman 9la7 edden w zaman 3omar bn 3bdel3zeez ,w 3zman eleslam e997ee7 !

Anonymous said...

R.M.Z
you rock this is sooo true
o 3abarti 3an ara2 el kol :)

eman said...

يسلم تمّك.............................
تحيّة إلك.. لأنه أنا ميارح ما عرفت أدرس لنفس السبب... ☺

Anonymous said...

I'm proud we have you in our college!

Anonymous said...

il 7aki b balash!

Post a Comment

 
 
 

wibiya widget