هل انت مواطن اصيل

بتعرف كيف ممكن تتأكد إنك مواطن أصيل ومن عنا وابن البلد؟ يكون صاير معك إشي من هالأشياء المستحيل ما تيجي مع بعض :
تكون واحد بيضحك من قلبه ومفرفش طبييعي بدون ما تفكره الناس مجنون أو مريض.

تمشي بالشارع وما تشوف حد عم "يبزق"، يعني إذا حظك حلو بتكون "نقية" وإذا حظك أحلى ما بتدعس فيها.

تحاول تقطع الشارع بأمان الله، يعني حتى لوكان الشارع فاضي فجأة بتطلعلك سيارة شكلها كانت بالغلاف الجوي يا إما يتحاول تدعسك أو بتعطيك زمور طويييييييييييييييل إلو معاني عدة أغلبها مصحوبة بكلمات ما بقدر أحكيها بتبلش بـ "يا ابن ...." وما بتخلص إلا بمرور السيارة، والسايق لازم قبل ما يركب السيارة يحمّي أعصابه ويشحذ لسانه.

تروح عالحسبة يوم العطلة أو يوم جمعة، و بتكون مصفي بالك ونيتك ورايق، إي بقص إيدي الثنتين إذا مارجعت عالبيت ضغطك بالسما والسكري ستمية وجيبتك فاضية ومعجمك اللغوي انزاد عليه كلمتين أو ثلاث بتكون أول مرة سامع فيهم، وفوق كل هاد "المدام" مش عاجبها شو جبت معك من السوق.

تروح على واحد من هالمستشفيات الحكومية وانت مريض بدون ما تتبهدل وتوقف ساعتين عالدور، وبعد عناء لما يجي دورك يحكولك انه "الدَكتور خلص شيفته... ارجع على موعد العيادة الثاني" الي بكون بعد اربع أيام، يعني بتكون الفاتحة مقروءة عليك، وإذا حظك من الآخر بكون موجود وبشوفك وبيفحصك وبيعطيك وصفة كمان وبيجي الوقت " تنلطع " قدام الصيدلية كمان ساعتين وأخيرا لما بتوقف عالشباك وبتقدم الوصفة المختومة من الدكتور وموقعة من المحاسب وإلي معها الوصل الزهري وملفك كله تمام فجأة بيطلعك الصيدلي بخلقتك وبكل برودة أعصاب وهدوء بال بيحكيلك " والله يا حجي هسة خلص الدوا من عنا، ارجع الأسبوع الجاي" ... "إي يخلص عمرك ان شا الله" ... وهيك بتروّح عالدار مريض ومبهدل وملعون أمل أبو أبوك وبدون دوا كمان.

تكوني بنت وتمشي بالشارع لمدة 10 دقايق مش أكثر وما يتحركش فيكي أكثر من 20 شب، ان شا الله لابسة خيمة فوق راسك ومغطاية لآخر إنش بجسمك، إلا ما يلاقوا إشي يعلقوا عليه.

تكون شب وكمان تمشي بالشارع وبتحاول تمارس حقك الطبيعي والدستوري بـ "تطقيس" البنات بدون ما يطلعلك مسبة ثقيلة أو بزقة أو أقلها جحرة أخت شلن من وحدة من هالبنات.

يكون يومك مار بسلام؛ بدون مشاكل ولا هوشات ولا أكشن – هاي لحالها صعبة كثير،بعرف! – بدون ما يجي حدا بآخر الليل قبل ما تتوكل عالله و تنام بشوي يقلبك فوقاني تحتاني ويحرق أعصابك ويخليك تلعن الساعة الي انولدت فيها بعدين يتصرف طبيعي ولا كإنه عامل إشي ... "إي يسعدلي القمر ما أحسنه >_< "

تروح على دائرة الأحوال أو التراخيص أو بس مشان تدفع وحدة من هالفواتير الي ما بتنتهي بدون ما تنلطع دور بالخنقة والأزمة والضغط أبو شي ساعتين ولّا ثلاث وبجوز تخلص معاملتك من أول زيارة .. ولَو ثنّي يا ابن الحلال، ثلّث يلّا شو مستني!... يعني هاد إشي من سابع المستحيلات، وإذا صدفت وزبطت معك هلّل لإنه حظك بيفلق الصخر.

تروح عالجامعة الصبح بس بدك تحضر محاضراتك وتروح زي الشطّور بدون ما يجوا ناس يلزقوا فيك ويحمّولك بالك وينقلوا منك الواجب و يتسلبطوا عليك بالكافتيريا ولما أخيرا تروّح بيقعدوا قعدة محترمة ومن ورا ظهرك بشلّوا عرضك ويحكوا عنك طرطور أو هبيلة

والأدهى من هيك إنه كل يوم الصبح بحطولك أغنية "وبحب الناس الرايقة... إلي بتضحك على طول! "... إيه فكوا عنّا انت و إياه

R.M.B