JN VIDEO

Popular Posts

الموظف النائم

Monday 24 May 2010




عمركم فتوا على مكتب موظف وتفاجئتوا إنه نايم؟ على المكتب أو تحته! مم، أنا جربت مشان هيك بدي أحكي عن الموضوع
يعني في تسيب بدوائرنا الحكومية ما بنقدر نطنشوا، كيف بدنا نحسن مجتمعنا وبلدنا وقبل كل إشي حالنا، إذا كل واحد مفكر إنه بيشتغل بشركة أبوه، وعلي ما علي لو بيشتغل عند أبوه كان بيشتغل عن جد
يعني لما أكون طالبة جامعة وأروح على موظف ولما أدخل ما ألاقيه، طبعا فكرت إنه ما في حدا وفجأة أكتشف إنه في بني آدم طويل عريض - الموظف- نايم تحت المكتب.. تخيلوا الوضع!
المشكلة مش بس إنه لقينا موظف نايم، المشكلة إنه هاد الإشي بصير كل يوم، ومش موظف أو اثنين وبأكثر من مكان. يا ريت تيجي بس على النوم يمكن نومهم أحسن من صحوتهم.. في موظفين ما بيقعدوا بمكاتبهم، يعني بالجامعة الطالب كيف بده يلاقي موظف إذا كل ما يروحله على المكتب ما بيلاقيه؟ ينصب خيمة قدام المكتب ويعيش هناك على أمل إنه هالموظف يتذكر إنه إله مكتب! وإلا يستأجر فريق بحث وتحري؟
وفي موظفين جايين مشان "طق الحنك"، يعني لو كل واحد التهى بشغله وبعدين حكى، شو رح يخسر؟ بس زرعنا لو طلعت يا ريت!
يعني فوق ما الحكومة مأمنيتلك شغل وبتعطيك راتب، بتيجي على شغلك سياحة وسفر؟! وبتروح على بيتك قبل ما يخلص دوامك! لأنه اللي مشغلينك فاتحينها سبيل!
والأدهى إنه في منهم بحملوا العالم جميلة لأنهم بييجوا يداوموا، يا ناس ارحموني، فوق حقه دقه!!
النقطة الثانية؛ الموظف اللي بيستغل شغله مشان أهداف شخصية"بحتة"، ما عم أحكي عن الرشاوى والواسطات، قصدي عن اللي بجيب الناس على مكتبه مشان يسمسر عليهم – مثلا – وأنا لاحظت هالإشي بالجامعة؛ بعض موظفين بجيبوا طالب خليجي أو مش أردني وبيسمسر عليه حتى يأجره شقة أو إشي، طيب روح افتح مكتب سمسرة أحسنلك!!
في كم موقف صاروا معي أو مع حد بعرفه، لازم أحكي عنهم:
- موظف جامعة بيطلع على مؤتمر مع طلاب الجامعة، ما بخليهم يكملوا المؤتمر وبيروحهم بكير مشان إيش>> مشان يلحق يمر على أرض – يا ريتها على طريقهم كمان – لأنه بده يسمسر عليها.
- نفس الموظف بيطلع مرة ثانية مع الطلاب، كمان ما بخليهم يكملوا المؤتمر وبيطلعوا وبعدين بيتركهم مع شفير الباص وبيروح لحاله..
- موظف المفروض إنه المرشد الأكاديمي، الطالب بيحتاجه ضروري لشغلة بتتعلق بالتسجيل والبرنامج الدراسي، بيروح الطالب تقريبا كل يوم وما بيلاقيه، وبطلوع الروح بيقدر يوصله ويا ريت استفاد، لأنه الموظف اختفى من جديد>> صار "لا يمكن الوصول إليه حاليا، يرجى المراجعة فيما بعد" ، يعني متى؟ بعد ما يخلص التسجيل والطالب تروح عليه؟!!
- موظف بعمر أبوي وإلا ليش، بعمر جدي، بدي أحكي بالمشرمحي>> "نسونجي" .. استحي على شيبتك.. طالبات الجامعة أكبر من أولادك!
في قضايا كثير بتصير والناس بتطلع عليها، بتعلق، ممكن تضحك وتعملها نكتة، ممحن تعصب أو تتضايق وبعدين بيمشوا عنها ولا كأنه في إشي، في ناس بتعطي أعذار للناس، ما في داعي نعطي عذر لكل بني آدم بيغلط، يعني اللي بصير معه ظرف، أو اللي بكون تعبان، وهداك أبصر شو كان عندهم مناسبة الليلة الماضية وهديك ابنها ما بعرف ماله، يعني أنا بعرف إنه الناس بصير عندها ظروف، بس الواحد بصير معه ظرف يوم، يومين، أسبوع.. أحكيلكم وشهر مني زيادة، بس مش طول السنة!!!
برأيي لازم يغيروا المعايير لما بدهم يوظفوا حد، ولازم يطبقوا القوانين مش بس يحطوها، ولازم الكل يتحاسب، وما تنترك الشغلة شوربة!!
ارحمونا يا عالم، لمتى بدنا نضل نتفرج ونسكت؟ لو كلنا سكتنا شو رح نستفيد؟ ليش كل واحد بيستنى الثاني يحكي؟ ع هالحالة ما حد رح يحكي.. هيك رح نضل واقفين مكاننا وما رح نتغير.. وبالأخير بنحط الحق على المجتمع والناس.. طيب إنت مش ناس ومش من المجتمع؟ لازم نتحرك إذا بدنا نطور مجتمعنا.. بنشوف التسيب بالمؤسسات الحكومية وبنضحك عليه.. فرجوني شو رح تفيدكم الضحكة لما تلاقوا كل الموظفين بالمؤسسات نايمين وما في حد يمشيلكم شغلكم.. وبس تصير الشغلة بتوقف ضد مصالحكم بتتذكروا تشتكوا وبتسمعونا صوتكم.. بكير والله!!
موظف نايم.. موظف صاحي.. موظف لا شغل ولا مشغلة.. موظف غايب.. موظف متأخر.. موظف مثالي.. كلها مجرد تسميات لموظف في المجتمع.. المجتمع اللي هو أنا وإنت وهو وهي...

7 comments:

Anonymous said...

Raheebah ;)

Anonymous said...

jameeeleh ! =)

ahmad barghout said...

ooof m32ool fee heek ll darjeh !!!
sart m3e sh3'lat bs moo ll darjeh hay , bs bnfas el wa2et msh 3'areeb 3ann el mowadfeen ysoo heek.
aktar eshe bkraho lamma yrw7o mn dwamhom bakeer .

3'eer anno brmdan el wa7d mnhom b7aml kol el nas anno saym , k2no bsom 3shana !!!

Sally rehani said...

enno alla ys3ed alla sho bfham elli katabooo ... Jaddd 3laaa rasiii mn foo2

R.M.Z said...

Thanx everyone :)

Ahmad, yes, b9er, ana mjarbeh aw 9ar 2dam 3youni kol had, ma jbt eshi mn 3ndi, o kman bl jam3a :S

Sally,, yslm rasek ;)

S.S said...

ME LIKE ^_________^

Anonymous said...

no one deserve his job >>>>>>>>>> even in my uni

Post a Comment

 
 
 

wibiya widget